ZOMITE LAKA KRIS SAPTUAM LUTNA TANCIN

Gam teng ah Kros sihna thupha,
A than in hong thang kimvel hen;
Kalvari ah khua hong vak hen,
A vaak kawlmawng pha'n hong vak suak hen.

Thumapi:

I thupi agelh en a kaihkhawm hilou ahih man a kimlou leh cing zou lou deuh a om tham ding. Bulpan khat a om phot kei leh a ban zop ding om thei lou, awlmoh huai ahihman hong ki gelh hi. Taksa lam hiin, khalam hileh i pianna, i khanna, abul-abal i theih chiang kei leh gen khelh, sak khelh kia hi lou kilawmlou tak a awm khak theih hi. A sisan manpha a Kris in a leisa Saptuam hoihlam a nawt touh theih zel deihna in laisiangthou ban lam, a lampi a hong ki hon dan, nna a ki sep dan leh a tel kha mihingte et kiik hun a om kuul chih ngaihdan a om man a hong kigelh ahi.

Pasian in a kibatpih a abawl, a puuksia khin mihingte a it man' a manthat louhna ding uh lampi a bawlsak tawntung hi. A lampi bawl kawkmuhtu ding in a bukimlou mihingte mah zang hi. Laisiangthou a Pasian' mi zatte en le, mihing ngaiha bukimlou leh cinloute ahi kha ding uh. Pasian zat theih a na om mite amau lam a ki-sit leh cinlou kisate hi nak uhi. Kumzabi 20 beikuana Zomite laka Kris Saptuam hong ki tundingna ah leng hiai thu mah a tel hi. Mihing lam a et a suan ding bei i hih ngaihtuahna i thu sung tawng ah a tel den ding hi. A lamsialtu Pasian in, a sithuai mihingte mah zang a A tangthupha a hon muh sak ziak in thupina Ama'n tang hen.

KIDOUPI II A USA A TEL ZIAK A TAANGTHUPHA DALHNA:

Guwahati leh Shillong kal lam kim a om Nongpoh khua nawl ah Saiden ki chi Khasi khua khat om hi. Kidoupi II lai in huai khua a Welsh Mission apan inntuan khiak ngaisa pawl khat om uhi. Kristian tangval (?) American G.I. (?) a min Parker Henderson, huai khua ah posting in va om kha in (gal ven nunga Bangkok missionary a om) Mawlai, Shillong a le inntuan sawm om ahih thu va theikha hi. Intuan sawm pawl' lungawi louhna bel Welsh Missionte thugen za a baptisma tangsa
member ding a pom theih leh pom theih louh omna thu hang ahi. Galpi ven nung, 1949 kum in, E.W. Mcmillan, Abilene Christian College, Abilene, Texas, USA (tu a university hita) a heutu khat in hiai pawlte ngaihven in Shillong hong pha hi. A mi vehte lak a tei leh kiva tak phamsa Prenshon Kharlukhi in Abilene Christian College lectureship khat va siim in, Assam (NE reorganization ma a North East India) ah Kris saptuam om thu va phuang hi. Hiai thu in ngaihven a loh ahi ding, a kulmuut lou deuh Christian churchte leng hong ki golh in, tuni tan in Mawlai, Shillong ah biakna inn tuam tuak nei in om uhi. John Calvin khakte Welsh Mission munpi Khasi tang a Shillong a pan in Kris tangthupha mihingte buaina lak a kipan in hong pak khia hi.

MIHING LAM A LOHSAM KISAKNA APAN TANGTHUPHA DALHZAKNA:

Hiai thu ziak a, Khasi tang a unaute phungvuh ding a tuipi gal pan a hong diang lut masapen tuh phamsa J. C. Bailey, huai hun lai a USA leh Canada a Kris pasalpha ahi. Amah 25 April 1963 in Calcutta (tu a Kolkata) tawn in Guwahati ah hong leng lut in Shillong 26 April 1963 in tung hi. Amah toh hong kipan ton, a zi leh tanu thumte hon tonpih, siamna lam a undergraduate, nasep lam a louneimi (farmer) William Ray Mcmillan leh Royal Canadian Navy a Chief Cook pension, trained male nurse, David W. Hallett te tuisuahgiat tung a meikhu long a hong pai in - Atlantic, Meditterranean, Suez Canal leh Arabian tuipite kantan in Bombay (tu a Mumbai) hon tawn in kha thum vingveng a hong pai nung uh July 1963 in Shillong hong tung uhi. Amaute huh ding leh Mawlai a school enkol ding in M.Ed khat Donald E. Perry leh a zi phamsa Miriam BSc (Nursing) leh a tate uh huai kum mah August in hong tung uhi. Northeast a Kris saptuam sap tangval, David W. Hallett gen dan in, amah thunasepna lam a kiciilna nei lou damdawi lam nasem (medical work) ding a a gam ua a nnasep khawlsana hong diang khia ahi hi. Khasi tanga sithu-nam zena a nnasepna mun sanga louma limchi zaw mu kisa in J.C. Bailey in Madras (Chennai) ah bu khuak in a lawmte taisan hi. A nawtsiatten Mawlai leh Lummawrie pansan in a thunasepna uh kuhkal tak in sunzom tou zel uhi. Hiai hun in, cawmtu nei lou ahihman un, Khasi unaute hon tawikhawm anteh-louhing peuh ne-a a ki naamtaak ni uh tam hi. A gah loh ding om pah kei mahleh, haksatna tuamtuam laka khawlsan lou a ginom taka a sep ziak un, amaute zang in Zomite lak ah tangthupha thulamdang hong lut kha hi i chi thei ding.

A KHUAVEL PUAK KHIAK THIL A PAN TANGTHUPHA DALHZAKNA:

Kidoupi 2 khit kum 30 sung tuh USA ah Kris saptuam vanglai a chih theih ding. Galpi hong ven a America galkapte mahni innlum sung a hong khosak chiang un; gam tuamtuam a galkap a paina ua amit ngei ua ava muh uh gammial hon vei mah mahta uhi. Galmuangta Amerika tuh neek-taak zonna, sumsitna, salam leh khalam bangkim ah masawn mah mah in, sum lam ah haksatna a nei tawm uhi. Hiai lai in Kris saptuam tuh USA ah a pung hat pen hi. Gensa bang in gammial a vei ua, tualsung saptuam, Bible College, Christian institution leh forum tuam tuam ah "mission" a uang bawl uhi. A tup pen uh kumzabi 20 beima a khuavel teng a tangthupha puanzak ding chih ahi. Hiai hun a a thilhihte uh a lamdang deuh nih i taklang ding : (1) "Bible Chair" a chi ua, secular college leh university ah a lunglutten Pasian thu thuksem a a zil theihna ding uh a va hong uhi; (2) "Exodus" a chi ua, gingtu omlou hi a atheihna uh khua USA leh South America khawng ah innkuan bangzah hiam va peemlut in saptuam a va pankhia uhi. Hiai husa in Canada gam leng a zeel a, huaite nasepna ziak in Zomite lak ah tangthupha hong tung i chi thei ding.

INTERNATIONAL POLITICS TUNGTAWN A TANGTHUPHA DALHNA:

Pandit Jawaharlal Nehru, India Prime Minister masa pen zal in, British Commonwealth taisan lou in, khovel a democracy gam lian pen- India in, Socialistic pattern zui in USSR (tu a keekzakta) lam ah awn hi. Democracy champion thupi pen USA in a ki-ui pih USSR dalna ding a suahlam gamte a thuzoh lai in, India deek in, ki nungngat san tuah helhal uhi. Hiai hun lai in US mi thunasem ding genlouh, tourist nangawn India a lut phalsak lou hi. Thu nasem a omsate nohkhiak theihna ding lampi zawng in, noh khiak theih liai nohkhiak hi zaw hi. British Commonwealth a om ve , muanna deih gige Canada leh India bel a lang tang in leng ki houthei mahmah uhi. Lemna deih tuaktuak gam nihte kikal ah ki theihsiamna om ziak in "restricted area" ah leng inner line pass nei lou a lut theihlouhna gam (Northeast) tanpha ah "teacher" ding in Canada a pan hong lut thei uhi. Hiai ziak in Canada lam a pan in Zomiten tangthupha za kha i hi i chi thei nawn. Huchi dinmun ah USA a Kris saptuam in Far East, Africa, South America leh Australia lam ah gam keek mahle uh India ah hong lut thei lou uhi. Hiai thu toh kisai a J.C.Bailey gelh thu khat i kalzeh zual ding. Kuala Lumpur a thu nasem Ira Y. Rice, Assam a hong lut ut, kha thum angak nung a leng Indian Embassy in phalna a piak ut louh un, Dum Dum Airport (tu a Netaji Subhash Chandra Bose International Airport,) leh Calcutta khopi kikal bus sung a mikang numei nihte houlimna a bil ana doh giik-geek hi. A khat pen in Assam-a a lut kiikna ding a visa a muhlouh ziaka a buaina a gen lai in, a khat in visa pawimoh lou leh haksatna a neih louh thu a gen hi ! Visa pawimohlou nu bel Canada mi ana hi chih a theikhia a. Huchi in Thupiak Thupi Northeast India a pawluttu ding in Pasian in Ira Y. Rice zang in amah J.C.Bailey Canada mi tuh ana manta hi. Pasian in khovel vaihawm liante ki ngiik tuah lai in, nitum senglou gama kumpinu vaihawmna zal a thil om zang in Manipur tanggam a Zomiten a tangthupha i muhtheihna ding lampi ana sial ahi i chi thei nawn hi.

INDIA MALSAK (NORTHEAST)- ASSAM, MANIPUR, NAGALAND A ZOMITE LAK A GINGTU MASATE:

J.C. Bailey in Shillong-a a nutsiatten, Cottage meeting /film strip, Baibul galzilna, tract hawm leh English service nei in nasem tou zel uhi. Hichibang a thu nasem missionaryte (chi teitei lai leng) 1964 phalbi suuklaia a thil tup uh toh va zongkhia masate tuh phamsate Piangzathang, Pumkhanlal leh Tunzakhamte ahi uh. Hiai gelhtupa theih khak, Kris saptuam a behlap masak khenkhatte tuh:

• Assamese kam pau zang : Jnan Bora (Time Magazine a Kris saptuam advertisement a sim apan lunglutna nei).

• Lusei kam pau zang : Phamsate Lalhmingthanga, Lalpianga leh a zi Rialsibon (Pi Riali) ? Lalpianga bel CID ahi a Kris saptuam tract Lusei pau a ki gelh a heututen simsuak ding a thu a piak uh ziak a Pasian thu mu ahi.

• Meitei kam pau zang : Shyam Sundar Salaam, Shyam Sundar Soyam, (Raghu) Mani, Shyamanand Salaam??

• Naga kam pau zang : Somba Chang, Namrai, Niumai ?..

• Zomi kam pau zang : Sinlaite: Nengkhozam, L. Kamjakhup, Thang R.Thawmte, Lianthangjuan Tonsing, Phamsa Pumkhanlal, Phamsa Tunzakham, Phamsa V. Pauthuam, T. Cinkhopau, Tonsing T. Khanpau, Nengzapau, T. Ngulkhopau, K.Thangkhogin?

Gaalkaapte leh a innkuante uh: Phamsa Liancinthang leh a zi Amzacing, Thawngpu leh a zi, Tuanggou, Mrs Vungzangai (E. Khaizacin zi)?..

Pasian in Zomi tangval hatlaite zang in Shillong tang a pan in Vangai tang a American Baptist leh Welsh Missionte louma ah Kris Saptuam tuh in a pou sak a; Manipur kia hilou, Mizogam leh Burma (Myanmar) tan pha tangthupha in zelta hi.

KHASI TANG A PAN ZOGAM HONG TUNG TANGTHUPHA LAMPI:

Khasi Tang tanvak ding a Pasian in galkapte leh sinlaite a zat bang in, Zogam tanvak ding in leng huaite mah zang hi. Gaalkaapte tancinhoih thehdalhna midangte sui ding in i koih ding a sinlaite a lam i en ding.

Assam Bible College om ma in, Northeast India a siamsinna munpi Shillong ah College naupangte zang a tancinhoih dalhsak tupna a om hi. Hiai lai a thu nasepna vanzatte hichibang in a gen theih ding hi:

• Cottage Meeting/House to House visit/Film Strips

• Baibul galzilna - English Khasi, Lusei, Manipuri leh Paite.

• Laibuta (tract) leh pamphlet hawm : English, Khasi, Lusei, Paite.

• Nipi khawl sung a short summer Bible school leh phalbi khawlsung a college sinlaite tangthupha gen ding a mau khaw lam asawl. Amah David W. Hallett gen dan in Bible College chii a hong kituhna ziak khat tuh nipi khawl sung a short summer bible school neihsek hi in a gen. Huai va siim kha hiai gelhtupa theih khak Kris saptuama behlap khenkhatte hiaite ahi uh: phamsate V. Pauthuam, G.Vumzathang, Liansavungte?.

St Edmunds' College, Shillong a, Dr Hamlet Bareh nuai a Indian History graduate William Ray Mcmillan in Dr Raymond C. Kelcy nuai ah Oklahoma Christian College ah 1966 kum in BA Bible leh English va zou nawn in; azi Ellen Mckutcheon leh alawmpa Robert A. Parker leh a zi Sharon hon tonpih in, Weyburn Church of Christ, Sasketchwan, Canadate etkol na nuai ah July 1968 in Assam Bible College, Shillong ah hong dinkhia uhi. (Assam a pan a Meghalaya state picinga a inn tuan nung in, Assam Bible College pen alamtom a ABC mah chih theih ding in Alpha Bible College a khek ahi) Huai nung kum 2 sung in David W. Hallett leh Robert A. Parkerte nupa in Mt Zion Bible School, Kakinada, Andhra Pradesh ah a pai san ua, Canada leh India a unaute pang khawm in, Canada-a a kiknawn ma hiai Bible College, Ray Mcmillan in enkawl hi. A paisan nung kum 2 sung India a unauten Bible College a etkol uh panpih ngai sa in, kua thu kua la dawn nawnlou in ABC a paitouh zel deihna in David W. Hallett hong ki sakhe nawn in kum 20 val ABC khak ahihtan dong nungzui bawlna leh nungzuite phungvuhna ding in pan hong la hi.

Tancin hoih chii mi tengteng a ding a piak himahleh a leitang in a ngeih na mun Manipur tang gam a ABC omsung bika a dalh zak dan zeh tel louh theih ahi kei ding. Hiai hun a tangvalte mangmat leh awlmoh pen tuh laisiangthoua a muh uh hotdamna lampi dik, biakna dik, thukhun thak saptuam leh sawltakte khut nuai a kumzabi khatna a lamtouh saptuam etkolna, a buahgawp bawlhoih thak a Martin Luther, John Calvin, John Wesley, Huldrich Zwinglite malakna sunzawm a, atuung a saptuam laisiangthou in a gen pen leitung a mitmuh theih ding a tun ding nawnna thu ahi. A thu pawimoh a sak dan uh a lian mah mah bawk a, a zak uh leh a theihte uh gen lou theilou a, tangval hat laiten Martin Luther hehpihna (grace), John Calvin’ a ciil pan khelhna (original sin) a master degree ngah khinte kianga, Pasian itna lamdang, hehpihna, ginna, zahngaihna, khamitna etc tampi gen masa lou a, thu a hon gen utuh, a gennate un `thil thupizawte phawklou' hiin a koih ua, a thugen uh dik thou sa mahle uh boh huthut ding dan in a na en kei peuhmah uhi. Himahleh a tangkou uh thutak thawm in gamteng a zel suak a, tunitan in mi tampiten lam tampi ah vualzawlna a muh lawh uhi.

Tangval hat laite nasepna ah, amau siamna, pilna, hatna thu hilou, hangsan taka a taklatna uah, ngaikhetute mitmei venna a tel louh ziak in, mi tampiten valh thei kei mahle uh, Pasian in a thu zang in, vual a zawl a, tuni chiang in Zomite tenna gamteng hiai thu in a zelta i chi thei ding. Nidang a England leh USA a Pasian thutak a kiiknawnna in kumsaang vaihawmna hun hoih hon tut ngei lametna neipawl tutan in ki om hi. Himahleh melmapa leng na khawl tuan sam lou ahihman in mun dang bang thou in unaute lakah ki khenna chi tuam tuam bang om sam hi. Huaiziak in thului bang sut hong ngai hi.

BANG DING A THU LUI SUT THAK DING?

Khovel tawp ding thu gen a, Pasian thu awi ding a chialna, Jonah in Nineveh khopi a a gen bang deuh a, tom chik a ki-kunte suante lakah, Arthington Mission leh American Baptiste huzaak hiau a na om khate kiangah hichiin tangthupha thu hong tung hi. I pianna, i khankhiakna leh hon dontute lam, i kipatna leh i zung khak dante etkikna in, Pasian nasepna a hoihlam-a ma a sawn ding deihna in, et kiik kul sakna lianpi hong piang hi. A dik tak in, Dr Peter Fraser (Daktor Sap) hon zui, gammial vei, saptuam etkolna toh kisai a training nei lou compounder, Mizoram a Sap Tangval chih a om, Robert Watkins in Senvon hausapa Khamkholun in Tancin Hoih Johan bu kawma a chialna ngeingaih lou a Aizawl pan Senvon a va hoh lou hi henla; Welsh leh AB Mission bial na ki hawm lou in, tancinhoih na vakvaih pih pawl (Zo sap lui leh thak - Edwin Rolands, Buanga leh midangte) na om lou hileh uh, Kris saptuam dik thu fel tak leh omzia neitak a tangkou pih na hita mawng leh leng tu sang in i pom thei zaw tuan de aw chih ngaihtuahna a piang thei hi.

Mi haupa kiang ah Abraham in Mosi leh zawlneite a om ve ua le, a chih bang deuh i hi kha de aw chih in a om. Hichibang ngaihtuahna mi nautang in i bat kei leh leng zilna mun i neihten, i kipatna, i zung khak dan ei mimawlte theihsiam theih ding in hon sui sau deuh le uh i ma a zau zaw in i thu nasepna in ma sawn zaw lou ding a de aw chih ngaihtuahna a om hi.

Hiai thu toh kisai in C.Leonard Allen leh Richard T. Hughes laibu "Discovering Our Roots : The Ancestry of Churches of Christ" thupatna a dotna, " A paisa hun leh thilte phawk kiik thei nawn lou hile, bang chi bang mihing i hi ding?" chih a dawnna uh i en zual ding. Pa khat, kum 50 a upa in zu a nak neek luat mana a khuak leh ngaihtuahna buai gawpa, kum 20 ahihlai tan lel a khuak in thei, huai nung lam himhim mangilh vek, neurologist khat in case study a bawl thu a gen uhi. Huai pa tuh mel-et in mi bat louhna nei lou in mi houpihnate hoih tak in dawng chiau chiau thei mahleh, a gen masak a gen nanung a mangilh tawm tawm hi. A zi-leh-tate gen taaklouh, zingkal a thoh chiang a limlanga a ki et chiang in leng kua hi hiam chih a ki thei kei hi. Amah hihna thei lou, a hun paisate en kiik a, hun hong tung ding ngaihtuahna him him nei thei lou ahihman in a mailam hun ding a mial mah mah hi. Hiai bang deuh in khalam thil ah leng i hihnate, i neu lai thilte na mangilh vek hita le hang, i dinna mun leng thei lou in, i hun paisa leh hun hong tung ding in leng omzia a nei thei kei ding hi. Kuate hi i hiam? Kuate suan i hia chih leh i hihna diktak i ki theih chet a kul hi, i kipatna, i khualzinna a i tawtsa lampi, a phei, a tou, a suk, i ginna mel puakdan seektute i mel theih kei leh i zinna lampi ah hamhaih in, gamchiam gam i lut louh khak ding thil lauhuai a hi kha thei ding hi.

I zungpi siangthou buahna tellou, apostlete hih dan zui kim vek sipsip, mihing lam thu himhim tellou, laisiangthou siang sitset-a pai, mihing’ chiin leh tawndan (socio-economic) khisiang vilvel a i ki koih khak nilouh a leh midangte sang a ki khang sang zaw, chihbel Pasian bang hial a ki bawl i hih khak ding thil lau huaipi ahi ding. Hoihkim sam lou, mi genthei i hihna phawk, khelhna nin a dim, Pasian hehpihna ziak a hotdam kinem ngam lel mimal leh saptuam i hih lam i kiphawk sak thakthak a ngai ding. Hiai ngaihtuahna in ei mihing cing lou i hihna, Pasian i pawimohna a lang sak semsem ding hi. Hiai toh ki zawitawn in hiai a nuai a thute a thuuk zaw sem in mimal in sui lai leng:

• Hon suangtute meel puak leh hihna theichian loupi a, midangte thusimlou a omkha hi lehang i ma vang zaw ding hia bing zaw ding? Pasian deih dan hi ding hia hi lou ding?

• Mihing ve mai, a cing zou loupi Pasian in a hehpihna a lampi a hon sial sak a ding kengkeng a paisawm i hihlam haih a, kisathei leh thuneitak a tangthu pha tangkou pih ding i diam? I ba a hon ngaihdam sak ziak a ei hon bate na tak a siik ding i diam? Ahihkei leh kiniamkhiak a Pasian thu in a ngaikhetute lungtang a nna a sep theihna ding a mun awn zaw ding?

• Hun paisa a uanuten a na hin pih uh, a ginna uh ziak a theihtawp a na suahnate uh en kiik pawl awm a, a hoih chiin ding leh a hoih lou pumpelh ding bang om hiam chih ngaih ven hunta hi lou hiam? Koi san a bawl phat ding om a, koi ah etton ding om hi hiam? Hiai in ei lak ah pan lak ding dan hoih zaw hon hilh thei lou ding hia?

• Kumzabi khatna a, Jesu vualzoua han-a pan a thawhnawn nung a Pentikos ni-a pan a lamtouh saptuam paitou zel dan siamnel tak a et kiikna in khalam leh salam a leng, nidang a ten Pasian lungtuak dinga pan a na laknate un zil ding tampi hon pe lou ding hia? En zil ding nei nawn lou a bucing vek ki chi ngam ding i diam?

• Tuni a khotang omdan (social life), nek-le-tak zon dan (economic life) omsaktute lak a khat tuh sahkhua ahi i chi lou thei kei. Huaiziakin, sau lua i sui phak kei leh leng Thado Kuki Pioneer Mission, Indo-Burma Pioneer Mission apan North East India general Mission/ Evangelical (Baptist) Convention Church apan Kris saptuam hong lut thu, Thuma leh thu nung et hun hita lou hiam? I khotaang hinkhua ki khekna bulpi tancinhoih ahi i chi lou thei kei ding. Koi san ah i hih fuh a, koi ah i hih fuh kei deuh a, bangchibang in pan la le hang khalam leh salam a khang tou thei ding i hia? I khotaang hinkhua leh nek-le-tak zonna toh kituaka a theih uh Welsh/ AB Missionten a hon piak uh deih khop ding i hi hiam? Pan lak ding dan bang a awm a? "Lungmuang in tu lai uh" la in a chih bang deuh a tu pheuphau thei lai ding i diam?

THE GIST OF ROMANS

An Exposition of Principal Doctrines of the Epistle to the Romans
By K.C. Moser Author of : The Way of Salvation

Gospel Light Publishing Company, Delight, Arkansas, Revised Edition : 1958

Thupatna. Amasa in Hotdamna i chih bang hiam chih i en phot ding:

1. Khelhna ziak a gawtna a pan suahtakna ahi i chi phot ding. Hih ding hih kha lou, hih louh ding hih khak ziak-a a gah lohna a pan ki humbitna leng a chih theih ding hi. Hiai tungtang tampi i gen kei ding, theihsa dan in i koih ding.

2. Hotdamna tuh i hinkhua khelhna thuneihna a pan zalenna hiam suahtakna ahi i chi ding. Huai omzia tuh Sawltak Paul in Rom 7:23 a a gen "khelhna dan tung a lenna". "Genthei hi na lawm lawm ing e!" a na chihna mun a pan suahtakna. Thil hoih hih utna lungtang doutu, sa hiang a "khelhna dan" sal a pan pawtkhiakna ahi (Rom 7:24). Aigupta sal a pan Isarel tate pawtkhiakna toh leng a tehkhin theih ding.

3. Taksa hi lou, Kha a Pasian, Kris Jesu leh Kha Siangthou toh kizopna Hotdamna" i chi thei nawn ding. Pasian, "Abba, Pa aw" chi a i kouh theihna leh Pasian "ta" bang a i om theihna tanvou (2 Kor 6:18; Rom 8:15,16). Hotdamte tuh Kris ah a om uh (2 Kor 5:17). Amah tuh Grep guipi ahi a, eite a hiangte i hi uh... Amah ei a a om in, ei Amah a om in i kizom hi (Jn 15:4-5). Huchiin, thil siam thak i hita (2 Kor 5:17).

Hotdamte kiang ah Pasian in Kha Siangthou piak a chiam hi (Nas 2:28). Huai Pasian kha tuh hotdamte ah a sungten hi (Rom 8:9; I Kor 3:16). Huai kha neiten, huai kha lungtang a pu ua, kha dan in a hing uh (Rom 8:5,6). Huai kha in gah kilawmtak mai bawk lihliah limtak mai a suang hi (Gal 5:22).

4. Hotdamna ding a hih dingte (Conditions): Hotdamna conditionte bang i chihna ahia? Ei pau a condition chih lehna ding thumal a kituah pih geih a vang hi. Thil khat a hong pian khiak theihna ding a thil dang hima sak ding poimoh omte chihna ahi pen mai. Huai condition i va hih buchin ziak a hotdamna loh khia hiam ngahzo i hi chihna ahi kei. Lohkhiak hiam hiam ngah zoh mai theih thil ahi kei. Huchibang a a tha hatna, pilna leh siamna a lei hiam sep khiak theih hi leh mihing in Hondampa a mamoh kei ding hi. Amah a ki hondam theilou ahih ziak in, a Hondamna ding Jehovah in a ngaihtuah sak hi.

Mihing in hotdamna loh khia hiam lei khe theilou ahih ziak in hotdamna a muh theihna leh tatkhiakna a ngah theihna tuh hotdamna condition ahi kei. Hotdamna thil hih theihna tuh Jesu Kris sisan ah a om a, mihing hih dingte, a conditionte hih ziaka muh ahi kei. Etsakna ding in ginna tuh hotdamna ding a thil hijh dingte khat ahi. Himahleh, mikhial tuh a ginna in hotdamna a pe kei hgi, chih tuh ginna in a tatkhiak theihna thil hihtheihna a neih tel ziak a hotdamna ngah ahi kei. "Hotdamna Lampi" chi a i theihte i zuihna ziak ke leu a Jesun hon hondam ahi kei chihna ahi.

Kris in a sihna ziak a i khelhnate a pan hon hotdam ziak in, ginna a hong poimoh hi. Jesu sihna thu a dik ahi chih a thu a theihpihna lel hotdamna ding in a hun kei hi, amah hondamtu ding a sing kros a kilh den Jesu a kipum ngak mai a ngai hi. Ginna in amah in theil hihtheihna a nei kei. Khelhna thoihna (atonement for sin) pomna thilhih ahi Hotdamna ding a thil hih dingte hon hihsaktu, "mere principle of action" ahi kei! Pasian a muan ngamna, Jesu Kris muan ngamna leh Bible muan ngamna in khelhnate apan hotdamna ding a lungtang a ginna a hon om sak ding hi. Ginna amah a khelh ngaihdamna hi mai lou hiam chih dawnna Peter in hichiin a na genta: "Kuapeuh mah amah gingta tuh a min ziak in khelhna ngaihdam in a om ding uh chih hia a tanchin tuh jawlnei teng teng in ana theihsak uh ahi" (Nas 10:43). Kris a ginna amah mai a khelhna ngaihdamna ahih kei leh, siamtansakna leng ginna vuak a tan theih ahi kei hi, himahleh ginna nasepten ngaihdamna leh siamtansakna a hon tun hi. Kris sisan tellou a hotdamna gen theih hi kei mahleh a khen in Kris leh a sisan tellou in hotdamna thu i gen kha sek hi!

Kisikna tuh khelhna dinmun a pan ki hei a, tapa taimang bang a bangmah hilou ahih louh dan hong ki phawk khia, a omna gam taisan a a pa kiang lam hon zuan; huchibang lungsim putna tuh Pasian zahngaihna tang thei ding a ki tau dohna ahi. A kisikna in hotdamna pe ngal dan a i gen leh i gen khial kha ding.

Baptisma poimohna leh nasep tuh ginna leh suk bukima, pichin sakna dan a gen ahi sek. Ginna leh kisikna tellou a baptisma gen ahi ngei kei. Ginna leh lungsim khekna latsakna ahi chih ahi sek. Baptisma in omzia a neihna san diktak tuh kilhden a ompa Kris ziak ahi zaw. "Jesu Kris min a" thil hih him him in hiai lam, kilhden a ompa Jesu lam a kawk zaw gige ding hi.

Hotdamna ding a hih dingte (conditions) in khelhna a pan kiheina leh kilhden a om Hondampa pomna lam a kawk zaw gige ding hi. Thuneitak a"Hotdamna Lampi" zui ding a nohna lam sang mah mah in, mahni lungtang sia-leh-pha theihna siang a hong pawt, Kris sdisan i sanna lam ahi zaw hi.

Mihingten theihsiam haksa leh pom hak i sak pen pente lak a khat tuh Hondamtu tak tak poimoh tak tak i hi na chih ahi. Hotdamna ding a bang hih ding hiam chi a, Hondampa hinkhua leh thu a pan zon sang in, "Jesun hotdamna ding a hiai hih in hon chi ahi" chi a hon hilh ding mi i deih zaw tangpi hi. Kisut chiang lehang hichibang ngaihtuahna nei i lak ah gintak sang in a om tamzaw kha ding. A Hondampa lam sang in eilam i gen tam zaw kha nak vial hi.

 5. Hehpihna (grace) leh zahngaihna (mercy) thutuun (principles): Ei leh ki hondam theilou i hih ziakin Hondamtu i poimoh hi. Hehpihna ziak a hotdamna thutuun tuh hiai ahi. Mi khialte sik leh tang a Jesu a hong sihna ziakin, mi khial tung ah Pasian a zahngai hi. Kilhden a om Kris tuh mi khialin a pom a ngai hi. Kros tuh hehpihna a hong om theihna ahi. Huai in hehpihna thutuun a om sak hi. Paul in hichiin ana chi hi : "Kris Jesu a om huai tatna ziak in, hehpihna a siamtan sak in a om ua, amah tuh a sisan ziaka a thupha twain hi in, ginna a muh ding in, Pasian in a luikheta" (Rom 3:24,25). New King James Version in hi chiin a letkhia hi "being justified freely by his grace through redemption that is in Christ Jesus, whom God set forth as a propitiation by his blood, through faith..". Hiai san a chiamteh ding tuh, hehpihna ziak a siamtansakna, Kris sisan a tatna leh thuphatawinate a kizop vek dan, ahi. Pasian leh Jesu Kris in tatna ding a a hihte uh hah gen zawk ding hilou ding hiam? 
 
6. Ginna leh hehpihna kizop dan : Ginna leh hehpihna thu kizom ahi a, a khentuam theih kei ding. Pasian in hehpihna a a thawn a a hon piak, ginna a san ding ahi. Khelhna thoihna Kris tuh ginna a pom ding ahi. Huaiziakin,"hehpihna a ginna (tungtawna) hotdam" i hi. A hon hondampa tung a i ki ngak zawk ding ahi. Huai kingak ngamna leh muan ngamna tuh ginna ahi. Ginna in omzia a neihna ziak tuh Kros leh hehpihna ziak in ahi zaw.
 
7. Hotdamna ding a hih dingte (conditions) leh Kros a kilhden Jesu ki zop dan: Hon Hondampa tuh Kris ahi.Huaiziakin hotdamna ding a hih dingte toh Kris a kizop a ngai hi. Kris toh a ki zop ding dan tuh hotdamna ding a hih dingte "bawlpa" ahihna ziak sang in khelhna pawtu ahihna lam ah ahih zawk ding ahi. Hotdamna ding a hih dingte sanna tuh Jesu " Toupa leh Kris" ahihna lam ahi zaw (Nas 2:36). I hih dingte i va hihna ziak lel hi zaw lou in Kris ah ahi hotdamna a om. Hiai san tak ahi a poimoh pen pen. Hiai san tak i hih dik kei leh Kros bangmah lou a bawl kha i hih ding ziak in.
 
Hon hondamtu ginna tuh kilhden a om Kris ah ahi zaw (Jn 3:16; Rom 3:25). Kisikna tuh "Kris min in" ahi zaw (Nas 2:38). Huchi mah bang in, baptisma leng "Jesu min in " ahi zaw (Nas 2:38). Hotdamna ding a thilhih teng teng in khelhna thoihna Jesu Kris lam a kawk vek zaw hi. Kris tuh hinna, lampi leh thutak ahih ziak in (Jn 14:6). Jesu Kris a ki pum ngakna lam a kawk zaw hi. Kilhden a om Kris naihna ding in kilhden a ompa a pawimoh zaw, anaihna ding lampi sang in. Kris tel kha lou a khelhna thoihna thugen in omzia a nei kei ding. Ann omloupi annkuang um a nek sawm toh a ki bang hi. A ann nek ding dan sang in a ann a poimoh zaw hi. Kilhden a om Kris tel lou a "hinna tanghou" ne ding a mi khialte chial kha kha khat hi lou ding i hi hiam chih ki ngaihtuah ni uh.
 
 8. Hotdamna ding a hih dingte mawk bawl khawm ahi kei uh: Siamtansakna ding a ginna chih se ahihna ziak a om hi. Huchi mah bang in hotdamna ding a thil hih dingte dangte leng. Akhen in i thu genna ah Kris in "thuneihna teng teng" nei ahih ziak in amah deih dan khat peuh peuh hotdamna ding a chi thei i chi sek. Hiai thil hi thei lou leh laisiangthou kalh ahi. A thuneihna sang mahmah in, a Kros ahi hotdamna ding a thil hih dingte om saktu. Doctor khat in MBBS a zoh ziak in, damlou a etna (diagnosed) ziak hi lou in damdawi hon gelhsak (prescription) toh a ki bang hi. Jesun mihing su buaitu natna tuh a 'diagnosed' a. Kilhden a om Hondampa zal a dam ding i hi. Huaiziak in mihing hotdamna tuh Kros in a om sak hi. A 'ann' quality in nek tak ahih leh hih louh thu a gen ding. A annkuang va um lel sang in huai annkuang nek tak ahih leh hih louh in thu a paw zaw. Huchi mah bang in mihing sanna lam sang in a hondamtu a poimoh zaw hi.
 
Kris in hotdamna ding a hih dingte tuh Amah thu thu a a tel khiak ahi i chih in tuh laisiangthou leh mihing ngaihtuahna ah leng a ching lou a suak ding hi. Hichidan a thu gen tu nai thil ahi! Pasian awina (Christianity) dan bang a ngaihtuahna (legalistic conception of Christianity) ziak a chin dan hong om
ahi zaw. Jesu "dan petu" chauh hi ta leh, a dan piak i zuih nak a leh, Amah a poimoh nawn kei ding hi. Isarelten Mosi dan a zuih nak ua leh Mosi mangilh le
 uh leng a pawi kei hi. Mi khialte hih ding a thupiakte tuh Kris toh a kizom hi, mi khial in Hondampa a muanna a latsakna a hih ziak in. Jesu dan pe ding a hong pai ahi kei a, Mosi leng hehpihna pe ding a hong pai ahi bawk kei (Jn 1:17). Hiai ziakin ahi hotdamna ding athil hih dingte "dan" bang a Jesu Kris sisan tel lou a gen khak ahihna.
 
Khenkhat ngaihdan leu leu lah ginna neih top mai ding, ngaihtuahna phut lou ahi chi pawl a ki om nawn hi. Ginna ding ziak leh kisikna ding ziak hoih tak i neih leh hun sa; Pasian muanna latsakna kul sa lou pawl a ki om nawn. Lung awi tak in huai dinmun ah a tu pheu phau thei uh. Hiai ngaihdan in Jesu thil lamdang hihte thei, Nikodem ngaihtuahna bang ahi: "Pasian a kiang a a om kei in hiai thil lamdang na hih bang kuamah in a hih thei kei ding". Hichibang ginna nei lel ginna tuh a thawn a suak ding. Tapa ahihna fiahna ding Jesun pe kei henla, ginna neih mai a, thu mang ding in chi suk leh hun hi mai lou maw?

Bang ding a "theihna zuau lou tampi a ki mu sak ahia"? (Nas 1:3). Ginna nei ding a thu piak mai awm tak ahi. Thoma kiang ah Jesun hichiin a chi: "Na khut zung in hon sawk inla, ka khutte en in, na khut in lawng inla, ka nak khawng ah sawk in, gingta lou in om kenla, gingta in" a chi. Gingta in chi suk mai leh hun mai hi lou maw? Thoma in a tak a a mit a a muh bang a Jesu ginna mit a muhna bang chi tuk a poimoh hiam chih simtuten i ngaihtuah zom ding uh...
 
Kisikna omzia theisiam mi in, kisikna ding ziak hoihtak a nei chih a ki thei hi. Ginna leng huchibang mah ahi. Hiai thu a hong kipatna tuh baptisma poimohna gen ot ut luatna ziak ahi. Baptisma a kulna ziak tuh Jesu thupiak a hihziak a zuih ngei ngei ding ahi chih thoh topna. Naaman Jordan lui a a ki diahna leh Jeriko kulhpi kimvel a paina bang lel a koihna ziak ahi. A thilhih dingte leh a gah (result) kikal ah kizopna a om kei. Huchidana ki thuhilhna in baptisma tang ding a mi hip nak sang in a hawl mang zaw hi.
 
Naman tui a a kidiahna tung tang ah, midang khat in amah a ding a thil ana hih kholh sak ziak a Jordan lui a a va kidiahna in damna a pe kei. Thupiak ahih ding ahih thoh hi. "Jesu min a ki baptis na" tuh Pasian leh mihing kikal kilemsak ding a hong pai Jesu Kris min a tan ding ahi. Jesu Kris a ginna a taklang hi. Kros in omzia nei lou hileh "Jesu mina baptisma"tuh Naaman kidiahna toh a kibang geih ding hi! Kros a tel louh leh dan bang a paina ahi ngal mai. Mi tamzawten Kros sang in baptisma i uang gen zaw uh. I thugen a bul a dik kei leh a tawpna lam a dik thei kei ding hi. Baptisma hichibang lel a pauhial a ngai kei hi.
 
9. Hotdamna leh khelhna ngaihdamna kizopna: Kris sisan loungal "khelh ngaihdamna" ding a om kei. Huai sisan in hotdamna a om sak a, a neihna ding a thil hihten a mun hon tungsak (while the conditions appropriate it). Kris in tatna nasep a sem khin a, mihing in a sang hi. Mathai 26:28 leh Nasepte 2:38 in thu kibang a gen hi. "Hiai ka sisan ahi ... khelhnate ngaihdamna ding a tampi a ding a pawt" leh "Kisik unla, khelh ngaihdamna ding in baptisma tang chiat un" chih. Khelh ngaihdamna thu a gen tuak uhi. Hotdamna ding a thil hih tuaktuak kisikna leh baptisma tuh Kris sisan toh kikim a koih ding ahi kei ding.. Kikim sak hita leng, Kris sisan in hon tat bang a, kisikna leh baptisma in leng hon tan thei chihna ahi ding. Huai hial tuh kuamahin i gintak uh a a uphuai kei hi.
 
 Paul in Romte 5:1,9 a a gen chiamteh ding a om : "ginna ziak a siamtan saka omna" leh " a sisan a siamtan sak a i omna". Hiai gel khentuam theih louh ding hia? Kris sisan a i kingak bang geih a ginna a kinga ding i diam? Thumal in a thu kimtakin a genkhe vek thei kei. Jesun, "hiai ka sa pum ahi" ahi chi a Toupa nitak ann a tanghou a gen dan chiah a pom ding i diam? "Ka taksa etsakna ahi" chihna in i pom hi. Rom 5:1 ah Paul in ginna thutuun (principle) a siamtan sak i hi a chi mah, a ziak tuh i ginna, i muan ngamna, Jesu Kris sisan sanna (natural response) ahih ziak ahi. "A sisan a siamtan sak" apostle in a chihin sisan zal a Pasian zahngaihna a genna ahi. Rom 3:5 ah Kris sisan leh ginna kizopdan hichiin ana gen hi: "Amah tu sisan ziak a thupha tawina hiin, ginna a muh ding in" chiin. Kris thupha tawina ahihna tuh sisan ziak ahi, "thupha tawina" ginna ziak hi lou in, a sisan ziak ahi zaw. Tulai pau a Bible lehthakte ah a sap pau in i en ding : "whom God put forward as the means of propitiation by his blood, to be received by faith" (Moffat).."For God showed him publicly dying as a sacrifice of reconciliation to be taken advantage of through faith" (Goodspeed).
 
Ginna hing chih zen a om (so-called 'positive') hiam thupiak hih thoh top (arbitrary) ginna tuh Pasian I gin leh gin louh etna (test) chih ahi nawn hi. A hun leh mun ahi tham ding. Ahihleh, "Jesu i Toupa tuh misi laka kipana kaithoupa" Pasian i muanna test na ahi kha ding hia? "Himahleh, koumau (apostle Paul in "we" a chih "eimah" chiin sim leng - pct) ki muang lou a misite kaithoupa Pasian i (ka -pct) muan zawkna ding uh ahi (2 Kor 1:19). "Amahziak in misi lak a kipana kaithoupa leh a thupina pepa Pasian gingtate na hi uh" (1 Pet 1:21). Pasian gintakna, muanna ringawt ahi kei.
 
Hotdamna ginna tuh Jesu Pa Pasian, sihna a pan Jesu kaithoupa ginna ahi. Hiai ah Kris a ginna a tel hi. Naman thu ah hichibang ginna a tel kei. Pasian thupiak zui a taksa vualzawlna kinem ahi lel. I hotdamna tuh khalam vualzawlna ahi a, Pasian, "Jesu Kris misilak a kaithoupa" ginna ahi. Naman bel Pasian muang ngam dan in leng a lang kei hi. Pasian a gindan tuh thuneipen ahihna (sovereignty) lam ahi zaw mah mah hi. Kris gingta lou miten hichibang ginna a nei thei tham uh.
 
Kris tuh dan petupa kia na hi hileh, Pasian awina (Christianity) tuh dan zuihna (legal system) khat lel ahi ding, kros bangmahlou na hita leh mikhial baptisma tanna tuh Naman kidiahna bang ahi lel ding! Naman tungtang ah thumanna omzia sui sau a ngai kei hi. Bang ding a thumang ding ahia chih dawnna tuh salam damna a muhna ding chih ahi mai. Himahleh baptisma tuh huchi lel ahi kei. Baptisma hichibang hai huai requirement dan a ngaihna a sawt nai kei. A gingta lou Judaten thei khial in Kros tuh haina a na sa uh. Huchibang mah in mi tampiin baptisma tuh thil hih hai huai dan a koih pawl a ki om. Toupa Nitak ann, hai huai chileng huai toh baptisma hai huai dan a kibang ding. Hai huai lou ahih dan lah gentam a ngai ngal kei a.
 
Hotdamna ding a thil hih dingte leh khelh ngaihdamna bang chi a kizom hiam? Kris sisan ah lou ngal bangmah kizopna a nei kei uh. Kilhden a om Kris toh kizom lou hileh hotdamna ding a thilhih dingte a om kei ding. Siamtansakna tuh khelhna thoihna Kris Jesu ginna ziak ahi. Huchibang ginna ahi khelh ngaihdamna ding a kigen: "Kuapeuh amah gingta tuh amin ziakin khelhna ngaihdam in a om ding uh" (Nas 10:43). Huchi mahbangin, kisikna leh baptisma tuh "khelh ngaihdamna ding ahi, a ziak tuh, "Jesu Kris min a hih ahihziakin (Nas 2:38). Kros tellouhna hotdamna ding a thilhih peuhmah tuh dan bawlna, khelh ngaihdamna toh kizopna nei lou ahi. Jesu sisan toh kizopna a neih khak louh ziakin.
 
Hotdamna ding a thil hih dingte leh Kros a kikalh kei, Pasian hehpihna leh hotdamna ding a thil hih dingten leng kituah louhna a nei kei, Kris sisan saanna dan ahih nak a leh. Hotdamna ding a thil hih dingte, Pasian hiam Kris thuneitupen ahihna saanna a zat a, Kros toh kizom lou a Kris khelhna thoihna muanna tellou hiam, "I Toupa Jesu misi lak a kipan kaithoupa" ginna tellou ahih leh, Kros bangmah lou suahna leh dan bawlna lel ahi ding. Kros in thumang lel ding in a hon sam kei hi, himahleh thumang ding a hon sap dan tuh kilhden a om Kris a kinga a thumang ding in a hon sam zaw hi. Pasian thupiakte, hehpihna kalh dinga zat dan hoihpen tuh Kris sisan tellou a thugenna ahi. Hotdamna ding a thilhih dingte tuh sisan in hon hotdam theihna zatna ahi. Pasian hiam, Jesu Kris thuneihna latsakna lel ding a hotdamna ding a thilhih dingte thumanna tuh a tup dan ahi kei him him.
 
Hotdamna ding a thil hih dingte sisan toh a kizopna ziak tuh huai in muan ngamna leh kingak ngamna a suk lat ziak ahi. Kris sisan toh kimatna ding a bang hiam thil thak zon khiak hiam dan thak bawl a ngai kei. A sisan ginna i chi hiam, Kris in a sisan a hong suahna ahi a poimoh. Kris tuh thuphatawina ginna a saan ding ahi. "For so greatly did God love the world that He gave his only Son, that every one who trust in him ... may have eternal life" (Jn 3:16 - Weymouth). "For God showed him publicly dying as a sacrifice of reconciliation to be taken advantage of through faith" (Rom 3:25 - Goodspeed).
 
"Pasian in khovel a nak it luat man in a Tapa neihsun a pia a, mi kuapeuh amah muang in .....tangtawn hinna a neih theihna ding un". "Ginna a saan ding kilemna dia kithoihna hi ding in tangpi theih in Pasian in a si sak hi".
  
10. Gospel chialna omzia: Gospel tuh tanchin hoih ahi. Jesu Kris i khelhna ziak a a sihna leh thohnawnna tanchin hoih genna ahi (1 Kor 15:3,4). Gospel leh thutak a kibang a koih ding ahi kei ding. Thutak peuhmah tanchin hoih ahi kim kei. Gospel chih Pasian thu chihna a i zat vek leh a dik kim kei bok ding. Pasian tanchin hoih, hotdamna tanchin hoih, Kris tanchin hoih, kilemna tanchin hoih i chi thei ding (Rom 1:1; Gal 1:7; Eph 1:13; Rom 1:16; Nas 10:36; Rom 5:1; Eph 2:14-22).
 
Tanchin hoih chialna in mikhial kiang a bang pentak ahia a tup chih i en ding. Thu khat saang ding a mi khial chialna ahi peuhmah hi. A dik a chialna thu a kigen leh Kris thu a kigen ahi ding. Mikhial kiangah Kris kua hi hiam? Kris in amah a ding a bang hih hiam? A saanna ding a aman bang hih ding? chih thute ahi ding. Kris tuh mikhialte mai ah tah hiam luikhiak ahi - Kris, Pasian Tapa, khelhna thoihna ahihziak a Hondampa thu a kigen ding. A kha khelhna nin a dim mikhial maiah sapsiang theihna sisan lui/tah ahi. A thu omzia tak tuh mikhial in a Hondampa pom ding hia pom lou ding chih thu ahi. Gen dan dang in gen leng zahngaihna luikhiak ahi; man neilou hotdamna thil thawn piak a lak ding ua piak ahi. Pom ding uh hia, pom lou ding?
 
Bang ding a sawltakte leh midangte Kris gen ahi ua? Bang ding a hatkhuma thugenten mikhialte hih ding : diktat ding dan, omdan hoih a om ding dan, panpih ngaite panpih ding dan leh adang dang thu genlou ahi ua?Huai mohpuaknate bang ding a genlou ahi ding uh? Hichibangte mikhial hih om (obligation) a kulmoh (need) masa uh ahi kei. Huaite ahisa ahoi. Mihing a khial a, mangthang ahi a, a poimoh tuh Hondampa, Tanpa ahi. A kibawl hoihna ringawt mimangthang Hondampa ahi kei.
 
Peter in Penticost ni a "Tu khang mi chih dan lou lou a omte lakah ki hondam un" (pct) chi a kikou laiin, a thu ngaihkhetute Hondampa pom ding a hasuan ahi. Thumang mai mai ding a hilh ahi kei. Mikhialte kisik mai mai ding a, Kris Kumpipa thunuai a om ding a a kiman uleh kiman louh uh chetna ding a ki baptis ding a chi ahi lel kei. "Jesu Kris min a", Jesu Kris khelhna thoihna leh a kumpipa ding ua pom ding a kisik a baptisma tang ding a chial ahi zaw.
 
Apostle Johan in a thugen chiamteh ni : " Theihpihtu (witness) hiai ahi, Pasian in tangtang hinna a hon pia a, huai hinna tuh A Tapa ah a om hi.Tua Tapa nei in hinna a nei hi: Pasian Tapa nei lou in hinna a nei kei hi (1 Jn 5:11,12). Motor thak a lei tuh a leitupa a ahi. Mikhial kiang a Jesu Kris tah/lui ahihna a hih a ( a lei a lei thoh hi lou), mi khial in anek a, a pom leh, Pasian Tapa Kris a nei hi. Hinna a nei. Sinsakpa hiam vaihawmpa mai mai hi lou a Hondampa nei ahita.
 
Mikhial in Toupa thu a man chiang in bang hih khia a kingai ding ahi ding? "Ka hih ding ka hihta a, thu ka mangta" a chi thei diam? Huai a lungkim mai ding a diam? Mi tampi hiai dinmun ah lungkim takin a tu pheu phau ua, a pawltak om ngal uh. Tu a Hondampa neipan, a bul a kipan ahihlam uh a phawk kei uh. A lametna tengteng uh a kipahna tengteng uh Kris, Pasian Tapa a awm diktatna, sianthouna leh tatna nei ahihna a a kingak ding ahi. Min a motor thak liklek a suan a, a kipahpih bang a, Kris a neih tuh, a suan a, a kipahpih ding ahi. Paul in thil tengteng "Kris a ding a manna" in a sim hi. Paul in dan tuh Kris in a kheng a. Amah a ding in Kris a pomta. Kris tang hi in a kigen hi (Phil 3:8).
 
Tanchin hoih chialna thu tuh kilhden Kris, mihingte khelhna pua Kris, Hondampa Kris ahi. Mi tengteng in I diktatna tengteng, i hoihna teng teng leh i lunggimna teng teng Hondampa Kris tung ah nga ni uh. Min tanchin hoih chialna thu a pom chiang in thu a man ziak a hotdamna lohkhia ahi kei. Hotdam ahihna ziak tuh Kris khelhna pawpa, Hondampa, Tanpa a pom ziak ahi zaw.
 
 Motor zuak pil leh kizen in a "motor" mah a zuak hi, azuakna dante (terms and conditions) hi lou in. Van zuak siamlou in tuh mikhialte kiang a "Kris" zuak lou in, "ngaihdamna dante" a zuak zaw hi. Khuaknei salesman in Kris kiang tunna ding a thil kulte sang in Kris Hondampa ahihna a zuak hi. Mikhialte te Kris ah a "convert" a, "ngaihdamna dan" hiam "saptuam" hiam ah hi lou in. Hichibang a Kris a convert a om mikhial tuh Kris mikhialte kiang a "zuak" ding a mansa ahi ngal.
 
Hiai i thugente tuh hotdamna ding athil hih dingte ngaihdauna dan a lak ding ahi kei ding. Himahleh Hondampa tawisanna leh domkangna a lak ding ahi zaw ding. Hotdamna ding a thil hihte "hondamtu" a hi ngal kei a. Kris tan dingte i gen ot louh zawk khak ding lau in pilvang ni uh.
 
Kris in amah tungtang a uang gente chiamteh ni : "Keimah tuh lampi leh thutak leh hinna ka hi, keimah a pailou kuamah Pa kiang a tung ngei kei" (Jn 14:6). "Keimah tuh hinna tanghou (ann) ka hi ... kuapeuh kei hon ne tuh keimah ziak in amah leng a hing ding" (Jn 6:35,57). "Kei thohnawnna leh hinna ka hi" (Jn 11:25). Hotdamna ding a thil hihte hih ziak a Kris in a kiang mite pilut hizaw lou in, amah hihna a aman mi a hipten, hotdamna ding a thil hih dingte hih in a kiang ah aman mi a pilut zaw hi. Amah ahi a Hondampa, hotdamna ding a thilhihte hi zaw lou in.
 
Mosi dan nuai ah bel huchi dan ahi kei. Mosi in Isarel tate Thu sawm piak ah a lut pih hi. Thu sawm piakten Isarel tate Mosi kiang a tun uh ahi kei. Dan in hih ding obligation a hon pia a, hehpihna in Hondampa. Mikhialte hiai Hondampa pom ding a chial ahi uh. Tanchin hoih chialna thu tuh hiai ahi.
 
 11. Hotdamna Omzia Theihsiamna : Hotdamna omzia theihsiamna i chi hiam, Romte kianga laikhak omzia theihsiamna tuh Kris ah a muhtheih hi. Thugin hilou in Jesu ahi Bible laimu. Mi khenkhat in hotdamna ding a thilhih dingte Christianity laimu a sa kha uh! Hotdamna dinga thil hihten omzia aneihna san tuh Jesu tuh "Toupa leh Kris" ahihna saanna ah ahi zaw (Nas 2:36). Sawltak Paul in Rom laikhak bung 3 leh 4 a a gen siamtansakna toh kituaklou pomdan tuh pomdan dik ahi thei kei ding. Kilemna (atonemment) omzia theihsiamna Romte laikhak genchetna (exegesis) ding in a kul hi.
 
Hotdamna tuh thil thawnpiak Kris kipumpiakna ziak a hong om ahi. Hotdamna ding a thil hih dingte tuh mihingten hiai hotdamna a pomna uh ahi. Hotdamna ding a thilhih dingte thuneihna a thupiak dan a genna leh khelhna thoihna Jesu genna leh mikhialten Pasian thu a zuih uh leh zuih louh thu uh chetna (testna) genna tuh thil dah huaipi a suak ding.
 
Siamtan sakna toh kisaia diklouhna tamzawte tuh kilemna (atonement) ahidan taka muhphak louhna ziak ahi. Huaiziakin, "Jesu Kris leh amah kilhden a om’ tuh Hotdamna theihsiamna chabi (key) ahi. Romte laikhak poimohna, theihsiamna tuh Jesu Kris kipumpiakna genchetna ah a kinga liu liau hi.
 
12. Pasian thu awina zau (Outline of Christianity) Pasian thu awina in a uapkhak sung hi a Paul in a gen tuh hiaite ahi : khelhna, mohna (guilt), siamlouh tansakna, kilemna (atonement), hehpihna (grace), ginna, siamtan sakna, sianthouna (sanctification) leh thupihihna (glorification). Khelhna omlou hileh mahni kimohsakna a om kei dinga, mohna om kei leh siamlouh tansakna (condemnation) a om kei ding a, siamlouh tansakna om kei leh kilemna (atonement) a kul kei ding a, kilemna om kei leh hehpihna a kul kei ding a, siamtansakna om kei leh sianthouna a om thei kei dinga, siangthouna om kei leh thupi hihna a om thei kei ding hi.
 
(Behlapna: Hotdamna, ngaihdamna, kilemna (atonement), diktatna (justice), siamtan sakna, hehpihna (grace), zahngaihna (mercy) leh Bible thu dang dang tampite ei Zomte lakah ahihna tak genchet haksa thil ahi. Pi-leh-pute amau mawl mawl in na mawl mahle uh lungsim siang leh diktatna hinkho zang mi ahi uh. Huaziak mah in dan lampang toh kisaiin leng ana thuk lut lawtel kei uhi. Bangteng hileh nam pil dan lam a thukpi na lutte, Judate, Grikte Romte a ding in leng hotdamna dinga Pasian thil gel tuh dan lam ah (legal aspect) sawisel bei ahi... Pct.)
 
Hotdamna omzia theihsiamna tuh Pasian Tapa, Jesu Kris leh mihingte khelhna thawihna ahihna theihsiamna ah a kinga hi. Mikhialte siamtan sakna toh kisaia laisiangthou a kigente, Jesu Kris Pasian Tapa leh khelhna thoihna toh kituaklou zawng a gen khak ahih in tuh thutak theih khelh in a om ding , chihna ahi. Mathai 7:21 leh Heb 5:9 Kros tel lou a gen vak khak theih ahi. Thukhun Thak leh Thukhun Lui kilamdanna thu genna a, dan petu thak in a dan thak a thupiak thak honpia hi dan a gen khak ahih in tuh nakpi a hih khelhna ahi ngei ding.
 
I Pasian thu awi omze neitak ahi. A hi ding mah, sawiselna ding omlou thil ahi. Mahni thu a deih kaih theih mawk ahi kei. Mikhial in a mamoh piak ahi. Hiai piakna mumal taka (logical) bawl ahi. Khelhna a om tak tak mah ahi a. Khelhna in kisiamlouhna, moh kisakna a om sak a, mohna in siamlouh tansakna. Mikhial siamlouh tangsa hotdam a a om theihna ding in, amah sik leh tang a kilemna (atonement) bawltu a om a ngai a. Kros tung tawn in hehpihna a om thei a, hehpihna in ginna a ngait hi. Pasian in mikhial tuh a hotdam theih ding dan om sun mah in a hondam hi.
 
Hiai a tung a thute hilh a omlou mi in midang hiai thu theisak ding in a hilh thei kei him him.Prescription bangzah hiam 'by heart' zok a damdawi zuak toh a kibang ding. Mi thunasem ding a chiltuten Pasian awidan (Christianity) omzia a hilh phot uh a ngai hi. Kris tuh 'ojapu' (teacher) hiam dan petu (law-giver) lel a thei mi in Kris thei nailou ana hi hi.